Спорт пайремыш уло кумылын

Спорт пайремыш – уло кумылын

Таче, 23 февральыште, «Корта» учебно-тренировочный базыште тренер, тале спортсмен-влакым шарныме лӱмеш ече дене таҥасымаш эртыш.

Тушко ече спортым йӧратыше ятыр еҥ чумырген. Ты гана молгунамсе семынак, ийготым шотыш налын, икмыняр старт пуалтын. Кажныштыже сеҥыше ден призёрым саламлышт.

Тыгак тренер, спортсмен-влак патырна-шамычым Шочмо Элым аралышын кечыж дене саламлышт.

Ӱмаште ик эн кугу ойыртемже тӱнямбалне чапланыше, лӱмлӧ ечызе, чемпион-влакын Николай Зимятов ден Александр Завьяловын, толмышт шотлалтын гын, тений СССР-ын сулло спорт мастерже, Российын сулло тренерже, ече дене тӱнямбал, тыгак Олимпийский чемпион Василий Павлович Рочев да тудын эргыже Российын спорт мастерже, Олимпийский модмашын бронзо призёржо Василий Васильевич толыныт.

Василий Павлович – землякна Нина Рочеван (Селюнинан) пелашыже.

Чаманен каласыман тале ечызын кок ий ончыч ӱмыржӧ кӱрылтын.

Шарнымаш таҥасымаш нерген «Марий Эл» газетын лишыл номерыштыже лудаш темлена.

Елена Эшкинина

Е. Эшкининан фотожо ден видеожо/"Марий Эл" увер агентстве